‘Ertjiewater’ hopelik Vrydag weer gereed vir swemmers

Dié vuilgroen water van die NA Smit Swembad en die munisipale swembad by die Kango Bergoord behoort teen Vrydag iets van die verlede te wees, sê die Oudtshoorn Munisipaliteit

Deur Liesel le Roux
DIE Oudtshoorn Munisipaliteit het dié week onderneem om op te tree teen munisipale ampte­nare wie se oënskynlike laksheid daartoe gelei het dat die water van die NA Smit Swembad en ’n swembad by die Kango Berg­oord in donkergroen ertjiesop ver­ander het.
Verskeie teleurgestelde inwo­ners het Die Hoorn sedert verlede week gekontak na­dat hul­le by die NA Smit Swem­bad in Parkweg voor ’n geslote hek beland het. Op die hek was ’n kennisgewing dat die swembad ge­sluit is weens “waterbehandeling”.
Die munisipale woordvoerder, Ntobeko Mang­qwengqwe, het gister in ’n verklaring gesê die swembaddens behoort Vrydag weer gereed te wees vir swemmers.
Volgens hom is materiaal wat verlede maand bestel is om die water te behandel, nie afgelewer nie. Die munisipaliteit het intus­sen ontdek dat amptenare nie ’n faktuur van R6 000 van dié diens­verskaffer aan die finansiële departement vir betaling deur­gegee nie en dat dit waar­skynlik tot die vertraging gelei het.
“Ons wil dit duidelik maak dat dié swak optrede deur van ons amptenare nie net die munisipaliteit se reputasie geskaad het nie, maar ook inwoners van die dorp benadeel het,” skryf Mang­qwengqwe in ’n sterk bewoorde verklaring.
“Dit is hier­die soort optrede wat daartoe gelei het dat die munisipaliteit diensverskaffers tot R70 miljoen skuld.”
Mangqwengqwe sê die munisipaliteit gaan die voorval ondersoek en dit mag lei tot ’n tug­­verhoor van die betrokke amp­tenare.
“ ’n Dringende reëling is intussen getref vir die vinnige aflewering van die nodige materiaal om die swembaddens mee skoon te maak, en inwoners behoort teen Vrydag die swembaddens te kan gebruik.”
Mangqwengqwe sê al die swem­baddens beskik oor le­wens­­redders.