Deur Liesel le Roux
Dit gons al sedert einde Januarie af op Oudtshoorn oor die munisipaliteit se beoogde hernoeming van Voortrekkerweg na Nelson Mandela Boulevard.
Inwoners kan sedert verlede week kommentaar aan die munisipaliteit oor die voorneme stuur nadat ’n openbare deelnameproses afgeskop het.
Uit die reaksie van inwoners in briewe en telefoonoproepe na Die Hoorn wil dit voorkom of die munisipaliteit groot reaksie gaan ontvang.
Die interessante aspek van die reaksie die afgelope weke en maande – en ook die afgelope week sedert die openbare deelnameproses op die dorp afgeskop het – is dat inwoners klaarblyklik deur die bank negatief is oor die voorgestelde naamsverandering.
Die redes hiervoor is egter talryk en uiteenlopend, soos van die lesersbriewe wat vandeesweek in Die Hoorn verskyn, ook aandui.
Dit is na ons mening ’n goeie ding as inwoners betrokke raak en hul mening gee tydens ’n openbare deelnameproses. Dit toon dat inwoners omgee en mede-verantwoordelikheid vir hulle dorp aanvaar.
Hopelik is hierdie betrokkenheid ook die voorloper van meer inwoners wat vergaderings oor dorpsaangeleenthede gaan begin bywoon – soos buurtwagvergaderings, vergaderings wat die polisie met die gemeenskap reël asook munisipale vergaderings.
• Geskrewe kommentaar oor die beoogde naamsverandering moet gestuur word na hd@oudtmun.gov.za of afgelewer word by die kantoor van mnr HD Visagie in die munisipale gebou in Voortrekkerweg. Mense wat nie kan skryf nie, kan die munisipaliteit nader vir hulp met hul kommentaar. Die sluitingsdatum vir kom- mentaar is 18 Mei.
The post Naamsverandering appeared first on DieHoorn.