DIE DA-kiesafdeling op Oudtshoorn het die Wes-Kaapse regering verlede week formeel versoek om in te gryp en die dorp onder administrasie te plaas, sê Pat Wagenaar, voorsitter van die kiesafdeling.

Volgens ’n persverklaring wat die DA uitgereik het, is die ANC/Icosa/NPP-koalisie wat Oudtshoorn beheer, “onwettig en onbekwaam”, heers daar groot politieke onstablititeit op Oudtshoorn en is dienslewering swak en verswak dit steeds.

“Vir langer as ’n jaar nou het die ANC deur uitsteltegnieke die demokratiese proses en die oppergesag van die reg op Oudtshoorn ondermyn om sodoende die DA te verhinder om die raad wettig en demokraties oor te neem,” sê Wagenaar.

DIE HOORN se Buitelugkosmaakdag is op versoek van verskeie lesers met ’n week na Saterdag, 20 September, uitgestel. Dié buitelugkosmaak­dag vind by die Oudtshoorn Aeroklub plaas en enigiemand kan kom deelneem en saam kom kosmaak.

Daar wag wonderlike pryse op elke deelnemer. Niemand sal die dag met leë hande huis toe gaan nie. Borge het ons behoorlik oorval met lieflike pryse wat wissel van wielsporings, wielbalanserings, toere, teaterkaartjies, etes, hotelverblyf, donkerbrille, naweekuitstappies en eetgoed.

Die hoofdoel van die dag is om lekker saam te kuier en kos te maak.

Deelnemers moet ’n hoofgereg en bykos/voorgereg oor die kole maak. Die inskryfgeld vir ’n span is R75 en braaidromme/-toerusting en hout moet self verskaf word.

Die deelnemers se rou produkte sal vanaf 12:00 beoordeel word. Die finale beoordeling vind vanaf 16:30 tot 18:00 plaas.

Die kaartjies en besprekings vir die Buitelugdag kan by Die Hoorn gedoen word. Vir navrae kontak Anton le Roux by tel 044 272 5605 of sel 083 395 9214 of stuur ’n e-pos na mark@hoorn.co.za.

Deur Marlene Malan

BY die bekendstelling van haar outobiografie, Here I am, verlede Vrydag­aand in die Prince Albert Gallery ontmoet ek ’n pragtige en innemende vrou wat tyd maak vir gesels.

Dis ’n heelal weg van die een wat ek, volgens haar eie erkenning en later op die bladsye van dié openhartige vertelling, leer ken – die een met die hang-ups, propvol onsekerhede, wat vernedering oor haar gewig moes verwerk, en wat nie altyd haar seksualiteit en talent verstaan het nie. Maar veral die een wat van ’n roemryke rock-loopbaan geval het tot in die dieptes van drankverslawing.

Dis moeilik om dié twee vroue – die een van toe en die een van nou -te versoen. Here I am vertel die verhaal van die opkoms en amperse vernietiging van seker die bekendste Suid-Afrikaanse rockster. PJ Powers was tot so vyf jaar gelede ’n reddelose drankverslaafde wat, as elke druppel drank in haar huis verorber was, haar gewend het tot die inhoud van spuitkannetjies.

Maar dit was ook haar keerpunt, “omdat ek gedink het ek gaan sterf”.  Nou is sy “skoon”, te danke aan haar gesin en lewensmaat, Yvonne Johnston.

Powers het grootgeword in ’n huis van politieke bewussyn, en daarom loop die geskiedenis van ons land se politieke maalkolk soos ’n goue draad deur haar vertelling. “Toe my emosionele lewe gefluktueer het tussen die uiterstes van skarebewondering en diepe wanhoop, was daar ’n baken van lig in my lewe: Nelson Mandela. Hy het ’n onherroeplike indruk op my gemaak. Ek was geёerd om te sing op sy eerste verjaardagparty ná sy vrylating, toe hy op 18 Julie 1993 75 jaar oud geword het.”

Powers het op 17 haar Durbanse ouerhuis verlaat om haar droom om ’n sanger te word, te verwesenlik. Dit was die tyd toe sy van haar “groot” liggaam bewus geword het. “Op 17 het die idee dat my liggaam onaansienlik was, deel van my identiteit word. Musiek was my ontvlugting.”

Sy vertel met humor dat haar “talent vir liedjies skryf saam met my hare en my stem gegroei het”. En so ook haar seksuele bewussyn, dat sy tot vroue aangetrokke is – iets wat in haar jongdae ’n taboe was.

Vandag weet sy wie sy is, sê sy. “Ek het Penelope Dunlop, die groot, onaansienlike meisie, agtergelaat. Dan was daar PJ Powers, die luide vrou wat gefloreer het op adrenalien en die kollig. Maar daar is ook die een van wie ek die meeste hou – Thandeka, wat in die Jabulani-amfiteater in Soweto gebore is, wat onvoorwaardelike aanvaarding en liefde in die stukkende townships van ’n oorloggeteisterde land gevind het.”

John van Reenen

Deur Marlene Malan

OP sy dag was hy een van die wêreld se bekendste veldatlete – die lang, fors­geboude man wat ’n skare laat stil word het wanneer hy die een rekord na die ander in die stof laat byt het; een daarvan, in 1975, die diskus­wêreldrekord van 68,48 meter.

Vandag, op 67 en tot sowat ’n jaar gelede blakend gesond, avontuurlustig en onafhanklik, word groot John van Reenen skielik gedwing om op ander mense staat te maak.

Die regtervoet waarop hy so ferm vasgetrap het vir diskusgooi en gewigstoot, wat hom gehelp het om internasionale sportstatus te bereik, het hy verloor nadat ’n operasie om infeksie uit sy voet te sny, skeefgeloop het. Dit het gebeur nadat hy in ’n stok getrap en ’n seer ontstaan het wat nie wou herstel nie. Die seerplek is uitgesny, maar – volgens Van Reenen – is hy as diabeet nie korrek behandel nie.

’n Nuwe medikus het die skok­aankondiging gedoen: Verloor óf jou voet, óf jou lewe. Want gangreen het al in daardie stadium ingetree en sy niere was beskadig.

“Eers is net my voet en daarna ’n deel van my been, tot so 5 cm onder my knie, afgesit.”

Van Reenen sê die eis van R4 miljoen wat hy teen die eerste behandeling­span – die hospitaal, internis en chirurg  – ingestel het, is nie ’n maklike pad  nie. “Maar regsmening wat ek ingewin het, was postief – ek hét ’n sterk saak.”

Want sy hele leefstyl moes verander: Die toekoms wat hy vir homself voorgestel het, bestaan nie eens meer in sy verbeelding nie. In sy geliefde woonomgewing in die berge buite De Rust kan hy nie meer vrylik rondloop nie, hy kan nie meer net in sy bakkie spring en die ruwe bergterrein rondom sy huis verken of in die veld saam met sy hond gaan stap nie.

Hy is gekluister aan ’n rolstol. Om doodgewone take en pligte uit te voer en ’n onafhanklike lewe te lei, is vir goed verby. Tafels en rakke en stoele waarbo hy voorheen uitgetoring het, is deesdae skouerhoogte.

Een van die grootste nadele is dat Van Reenen, ’n beeldende kunstenaar en voorheen kunsdosent aan onder meer die Universiteit Stellenbosch en Washington State University, nie meer kan staan en skilder nie. Om terug te tree vir perspektief is onmoontlik. “My skilderwerk is my ontvlugting, maar selfs dit moet ek nou anders aanpak. My hele lewe lyk anders – letterlik en figuurlik.”

Sy regsaak is een van verlies aan inkomste, pyn en lyding, sowel as die koste van toekomstige mediese behandeling weens nalatigheid.  Sy mediese fonds wil nie help met ’n prostese nie, en van sy voorheen doodgewone take, pligte en genietiginge is daar nie sprake nie. Hy het ook reeds sy mooi huis in die asemrowende, bergagtige omgewing verkoop.

“Ek is nie bitter nie; net geskok. Ek probeer my bes om aan te pas en aanvaar my hele lewe is in ’n nuwe rig­ting gedwing. Maar ek het baie verloor en moet my hele lewe herbeplan. Dit wys jou net – die een dag is jy nog op dreef, vol toekomsplanne, maar dan, in ’n oogwink, verander alles.”

Deur Liesel le Roux

REGSKOSTE van na raming R2 miljoen wag op die ses Suid-Afrikaanse skole teen wie ’n saak in die Hoë Hof in Johannesburg oor godsdiens aanhangig gemaak is.

Die skole gaan die hofaansoek teenstaan wat onder meer vra dat hulle verbied word om voort te gaan met sekere Christelike gebruike.

Hoewel AfriForum reeds aangebied het om ’n deel van die regskoste te dra, sal die skole elkeen ook ’n deel daarvan moet bydra. Twee van die skole, die Hoërskool Oudtshoorn en Langenhoven Gimnasium, is op Oudtshoorn geleë.

James King, lid van die Hoërskool Oudtshoorn se beheerliggaam, het Vrydag ’n vergadering  van verteenwoordigers van die skole se beheerliggame en die Federasie van Beheerliggame van Suid-Afrikaanse Skole (FEDSAS) in Johannesburg bygewoon. Hy sê al die skole het saamgestem dat die aansoek teengestaan moet word.

Die hoof van Langenhoven Gimnasium, Stefanus Potgieter, het gesê hoewel die skool nie ’n verteenwoordiger na die vergadering in Johannesburg kon stuur nie, steun hulle die besluit wat daar geneem is.

Paul Colditz, uitvoerende hoof van FEDSAS, sê die ses skole ontvang oorweldigende steun van die publiek en organisasies. Volgens hom het die skole vir Werner Human van Hurter-Spies in Centurion as prokureur aangestel. Die regspan word gelei deur adv Johan du Toit, SC, van Johannesburg.

“Die skole spreek hul dankbaarheid uit vir al die steun wat hulle ontvang het. Op advies van die regspan sal daar voortaan egter geen mediaverklarings uitgereik of media-onderhoude toegestaan word totdat die saak afgehandel is nie,” sê Colditz. Medianavrae sal deur FEDSAS hanteer word.

Minstens ’n duisend inwoners van Dysselsdorp het gister ’n optog na die munisipale kantore op die dorp gehou om hul besware te lug en ’n memorandum te oorhandig.

Deur Garnett Wicomb

GENOEG is nou genoeg. Gordon April faal die inwoners van Dysselsdorp en moet weg uit die dorp.

Dit was gister die gevoel van die minstens 1 000 ongelukkige inwoners van Dysselsdorp wat aan ’n vreedsame protesoptog na die Dysselsdorp Gemeenskapsaal deelgeneem het om hul misnoeë met swak dienslewering op Dysselsdorp en veral die optrede van die burgemeester, Gordon April, te toon.

Niemand van die munisipaliteit het opgedaag om die memorandum te ontvang nie en dit is aan die bevelvoerder van die Dysselsdorp Polisie, kapt Petros Dyantyi, oorhandig.

’n Tweede memorandum sou later ook aan ’n verteenwoordiger van die ANC oorhandig word wat volgens die organiseerder, Leon Campher, op pad was na Dysselsdorp.

“Die ANC moet verduidelik wat Gordon se posisie is. Hy verbreek die party se riglyne. Hy verbreek alle prosedures en regulasies en die mense van Dysselsdorp ly en dit deur Gordon se doen en late. Ons vra dat hy ondersoek word.”

Volgens Campher moet die ANC vir April tot orde roep of anders moet hy weg uit Dysselsdorp. Die optoggangers wou ook van die ANC weet waarom word daar nie ’n polisiekantoor op Dysselsdorp gebou nie, en waarom die burgemeester wyksvergaderings op Dysselsdorp hou, maar nie oor Dysselsdorp praat nie. Hoekom weier hy ook om met inwoners te praat.

Een van die optoggangers, Andries Abrahams, het gesê April laat selfs die dooie mense swaarkry.

“Gaan kyk hoe loop die diere oor die graftes,” het hy gesê.

Nog ’n inwoner, Johannes Prinsloo, sê die Oudtshoorn Munisipaliteit gee nie om vir die mense van Dysselsdorp nie. “Ons is nou moeg gesukkel.”

Volgens Campher word die ANC veertien dae tyd gegee om op die memorandum te reageer.

“Ons sal dan op verdere optrede in die toekoms besluit,” het hy gesê.

Hy het ’n beroep op die inwoners gedoen om nie iets onverantwoordeliks te doen nie en ook die Polisie bedank vir die hantering van die optog.

“Moenie ons eie goed afbreek en verbrand nie. Kom ons wys die wêreld ons kan vreedsaam protesteer. Bly kalm asseblief,” was sy pleidooi.

Deur Liesel le Roux

DIE Wes-Kaapse DA-leier, dr Ivan Meyer, het vandeesweek ’n beroep op alle inwoners van Oudtshoorn gedoen om volgende Maandag (15 September) deel te neem aan ’n optog op Oudtshoorn om te vra vir die herstel van demokrasie op die dorp.

Ook die burgerlike organisasies AfriForum, die Oudtshoorn Belastingbetalersvereniging en die Oudtshoorn Burgerlike Beweging het inwoners aangespoor om die dorp “te red” en saam te stap.

’n Driehoekige vergadering tussen die organiseerders, die Oudtshoorn Munisipaliteit en die Polisie oor die optog vind vanoggend plaas, nadat die munisipaliteit tot gister voete gesleep het om die optog goed te keur.  Volgens Pieter Luiters, een van die Oudtshoorniete wat deur die DA getaak is om die aansoek in te dien, is dit reeds verlede Donderdag ingedien. Hy sê hy is ná herhaalde navrae Maandag en Dinsdag aan die waarnemende munisipale bestuurder, Gaven Juthe, Dinsdagmiddag gevra vir “bewyse” dat die aansoek wel in opdrag van die DA gedoen is. Die nodige dokumente is gisteroggend aan Juthe deurgegee.

Meyer het egter intussen gesê die optog gaan beslis plaasvind. “Maandag se optog gaan voort,” was sy kort en kragtige antwoord op ’n navraag Dinsdagaand.

Honderde inwoners sal na verwagting Maandag met Voortrekkerweg na die munisipale gebou stap. Meyer sal die optog lei en by die munisipaliteit ’n petisie aan die burgemeester, Gordon April, oorhandig. Verskeie lede van die Wes-Kaapse kabinet gaan na verwagting ook saamstap.

Mense kan reeds vanaf 09:00 by Filco (hoek van Voortrekkerweg en Hugenotestraat) vergader vir die optog wat 10:00 vertrek. Diegene wat nie so ver kan stap nie of beperkte tyd het, kan om 10:00 op die parkeerterrein voor die Queen’s Mall vergader en daarvandaan na die munisipale gebou stap.

“Die doel van die optog is om die publiek bewus te maak van die ANC se onderduimse taktieke om die mag in Oudtshoorn te behou en om ons steun toe te sê aan demokratiese prosesse in Oudtshoorn,” lui ’n persverklaring wat die DA Dinsdag uitgereik het. In ’n advertensie van Die Hoorn vra die drie burgerlike organisasies inwoners om met hul optrede standpunt in te neem en nie langer te vra: “Wat gaan julle vir ons doen nie”, maar liefs vra: “Wat kan ons vir ons dorp en omgewing beteken”!

In die advertensie word sakelui ook gevra om die middagetepouse na tussen tien- en elfuur te skuif sodat personeel wat wil, kan saamstap.

• Die munisipaliteit het vroeër vanjaar getoon dat hulle nie gretig is om ’n optog van inwoners goed te keur nie, al word alle stappe gevolg wat wetlik vereis word.

’n Optog van inwoners is in Maart deur die munisipaliteit afgekeur ten spyte daarvan dat daar tydens ’n vergadering met alle belanghebbendes geen besware was nie.

Dié optog het uiteindelik onder die beskerming van die Polisie plaasgevind.

Ook die optog wat op Dysselsdorp wat na wat verneem word Dinsdag deur die munisipaliteit afgekeur is, het wel plaasgevind het en het onder  polisiebeskerming plaasgevind sonder enige onaanvaarbare voorvalle.

• In die lig van die huidige situasie op Oudtshoorn moedig Die Hoorn ook inwoners aan om in groot getalle aan die optog te kom deelneem.

Deur Higgo Jacobs

DIE Hoërskool Oudtshoorn open ’n nuwe teiken­gholfbaan op Woensdag, 24 September, op die sportterrein by die bekende Hap en Tap-gebou in St Johnstraat. Die Suid-Kaap Gholfakademie sal in die Hap en Tap-gebou gehuisves word.

Gholfliefhebbers wat hul vaardighede wil slyp, sal sonder twyfel dié nuwe geriewe verwelkom.

Die Struisies verskaf die infrastruktuur, maar die geriewe is oop vir die breë publiek en al die skole van Oudtshoorn. Meer leerders sal nou blootstelling aan gholf as ’n sportsoort kry.

Danksy die Suid-Kaap Gholfakademie se betrokkenheid word daar professionele afrigting vir ’n ieder en ’n elk in ’n veilige omgewing aangebied.

Die program skop op 24 September af met ’n gholfkliniek van 09:00 tot 10:00. Daarna sal handelsname soos Cleveland, Srixon en Taylormade demonstrasies met verskillende soorte gholfstokke lewer.

Van 14:00 tot 15:00 word ’n kliniek vir juniors aangebied.

Ander aktiwiteite sluit in ’n 50 meter houe-kompetisie en spel op ’n sesputjiebaan waar spelers hul kaphou- en setwerkvaardighede kan wys.

Al die gholfaktiwiteite is gratis vir die dag. Daar sal gholfhemde, balle, keppies en handskoene te koop wees. En niemand hoef honger of dors te ly nie met koeldrank en worsrolletjies wat deurentyd beskikbaar sal wees.

Volgens Berno Venter, wat gholflesse teen R120 per halfuur aanbied, sal die baan daagliks vanaf 11:00 tot 18:00 oop wees en Saterdae van 09:00 tot 18:00.

Roelof Roeloffze, ’n professionele PGA-afrigter, is Saterdae van 09:00 tot 17:00 vir afrigting beskikbaar.

Koopbewyse van R100 om te gaan speel, is beskikbaar, en ’n emmertjie oefenballe teen R30.

Die teikenbaan is beslis ’n opwindende nuwe sportontwikkeling vir Oudtshoorn.

Vir meer besonderhede kan Venter by 082 925 7918 gekontak word.

Deur Higgo Jacobs

Die personeel van die Wesbank Pre-Primêre Skool is voor van links Hanneke Fourie (opvoeder), Miena Chigoo (assistent), Cara Maree (opvoeder), Marietjie Potgieter (hoof), Alewyn Hanekom (skoolhoof van Laerskool Wesbank) en agter van links Joanie Gouws (opvoeder), Sylvia Piedt (assistent), Lizzie Claassen (assistent), Essie Maree (assistent) en Rika van der Rijst (sekretaresse).

DIE Laerskool Wesbank se pre-primêre skool wat op Vrydag, 31 Januarie 2014, inmekaargeval het, word tans deur die Departement Openbare Werke gesloop.

Volgens die skoolhoof, Alewyn Hanekom, is die beplanning vir die vervanging van die gebou tans in volle swang.

Dié skooltjie wat op 19 Januarie 1998 met 80 leerders geopen is, staan op die terrein van die Laerskool Wesbank en huisves tans 115 leerders. Volgens Hanekom is daar tans ’n waglys en kan meer leerders nie geakkommodeer word nie.

BOPLAAS Familiewingerde in Calitzdorp het die afgelope Vrydag die eerste wynkelder in die Suid-Kaap en Klein Karoo geword om drie dubbelgoue (Gran d’Or) medaljes by die 18de Michelangelo Internasionale Wynskou los te slaan.

Meer as 1 700 wyne van 322 kelders is deur ’n paneel van 14 internasionale beoordelaars beoordeel.

Boplaas, Kleine Zalze en Diemersdal was die drie topkelders wat elk drie dubbelgoue medaljes ontvang het.

Boplaas het by die toekenningsgeleentheid wat by die Lord Charles Hotel in Somerset-Wes gehou is, dubbelgoud gekry vir die Boplaas Bobbejaanberg Sauvignon Blanc 2014, Boplaas Cape Vintage Reserve Port 2010 en Boplaas Heritage Muscadel 2011.

Die kelder se Boplaas Portuguese Connection 2013 wat vir Woolworths gebottel is en die Boplaas Cape Vintage Reserve Port 2011 is met goue medaljes bekroon, en die Boplaas Straw Wine 2013 met ’n silwer medalje.

Verskeie van Boplaas se medalje­wenners het reeds ander toekennings ontvang.

Die Boplaas Cape vintage Reserve Port 2011 is vroeër vanjaar as die beste Suid-Afrikaanse port by die CAPPA Challenge 2014 aangewys. Die Boplaas Cape Vintage Reserve Port 2010 het op sy beurt by Veritas ’n dubbelgoue medalje gewen.

Dit is nie die eerste keer dat Boplaas geskiedenis maak nie.

Die kelder het ook in 2013 vir ’n eerste gesorg toe dit die enigste kelder in Suid-Afrika was wat vyf dubbelgoue toekennings by Veritas losgeslaan het.

• Boplaas het ook by die afgelope naweek se Nederburg-veiling uitstekend gevaar.

Die hoogste prys vir die Boplaas Cape Vintage Port 2004 was R7 980 per kis van 12 bottels.

DIE stelsel wat die Kango Grotte binne voltyds moet moniteer, is al sewe maande buite werking, sê die voorsitter van Oudtshoorn Toerisme, Niel Els. Dié stelsel, waarvan die doel is om die bestuur die nodige leiding te gee oor die impak van besoekersgetalle op die Grotte, sal duisende rande kos om te herstel.

Nog iets wat nie meer funksioneer nie, is ’n wetenskaplike komitee van kundiges wat in die negentigerjare deur die provinsiale regering in die lewe geroep is met die mandaat om die ekologiese welstand van die Grotte te verseker. Die Oudtshoorn munisipale raad het die wetenskaplike komitee in 2007 ontbind en die provinsiale regering het dit nie bevraagteken nie.

Die Grotte is lankal nie meer die “nat en glinsterende” towerwêreld soos dit beskryf is ná die koloniale ontdekking daarvan in 1780 nie.

Huidige gevare vir die Grotte se voortbestaan is onder meer stygende temperatuur, oormatige koolstofdioksied as gevolg van hoë besoekersgetalle, groen alge wat formasies verteer en die algemene degradasie en uitdroging daarvan. Die temperatuur binne die Grotte is reeds sowat twee grade warmer as in 1992. Net so het die maak van ’n kunsmatige ingang tydens die apartheidsera, tallose konserte met meer as 2500 mense per geleentheid en massatoerisme oor drie dekades met meer as 200000 besoekers per jaar ’n invloed gehad op hoe die Grotte vandag lyk.

Volgens Els kan die “raklewe” van ’n skougrot met kundige bestuur, wetenskaplike leiding en die nodige finansies verleng word, maar dit is juis wat nie gebeur nie.. “Dié debat oor die Grotte is juis ontketen nadat die Oudtshoorn Munisipaliteit miljoene rande uit die Grotte se beleggingsfondse geskuif het. Die munisipaliteit se belangstelling in die Grotte is bloot finansieel van aard.

“Die besluitnemers het nie die wetlik vereiste bevoegdhede  nie, is direk verantwoordelik vir die wetenskaplike verwaarlosing en die provinsiale regering is ook die laaste paar jaar so te sê afwesig en nie geïnteresseerd nie.”

Els sê die munisipaliteit het interessant genoeg twee weke gelede, nadat vrae die laaste tyd  oor die Grotte en die skuif van geld uit die beleggingsrekening gevra word, skielik die Grotte-bestuur gevra vir ’n lys “benodigdhede” vir die Grotte, soos die bewaringsbestuursplan, wetenskaplike komitee, herstel van die moniteringsapparaat en ’n dringende herbeligtingsprogram.

“Die kwessies is voorheen male sonder tal voorgelê aan die raad, sonder sukses.”

• Volgens die Erfeniswet van 1999 moet ’n bate soos die Grotte ’n wetenskaplike bestuursplan hê wat elke 10 jaar heroorweeg moet word.

Tweedens moet besluitnemers die nodige bevoegdheid hê.

• Die Kango Grotte-stelsel is miljoene jare oud. Die rots waarin dit gevorm het, is ’n honderdmiljoen jaar oud. Dit is ’n uiters sensitiewe en komplekse ekologiese stelsel, seker van die sensitiefste in die Suid-Kaap, en skade daaraan kan nie herstel word nie.

Die Wingerdstompies is een van die baie orkeste wat volgende naweek by ’n Boeremusiekfees op Oudtshoorn gaan optree.

VOLGENDE naweek gaan die klank van konsertinas en trekklaviere op Oudtshoorn weerklink wanneer die eerste Oudtshoorn Grootvoël Boeremusiekfees plaasvind.

Dié fees met ’n groot aantal bekende orkeste van elders asook plaaslike orkeste is die idee van Willie Marais, uitvoerende hoof van AIFA.

Hy vertel: “Een van die groot liefdes in my lewe is boeremusiek en om dié besondere musiek te laat voortleef, is vir my ’n groot missie en prioriteit. Een van my pogings om boeremusiek soveel blootstelling as moontlik te gee, is die reël van ’n unieke boeremusiekfees wat ek ’n jaarlikse instelling op Oudtshoorn wil maak.”

Die fees begin op Vrydagaand (26 September) met die orkeste wat vanaf 17:00 tot 01:00 by die Oudtshoorn Aeroklub gaan optree. Saterdag (27 September) word dit vanaf 10:00 tot om middernag op die verhoog van Brian’s Grill voortgesit.

Orkeste wat reeds bevestig het dat hulle kom optree, is die Kaapland Boereorkes, Die Sandvelders, Theo Slabbert, Die Wingerdstompies, die Donkiekarorkes – Brian Ferreira, Brian Nieuwoudt, Die Kaapse Affodille en Fritz Schoultz.

Marais sê hy wil die boeremusiekfees ook ’n liefdadigheidsgeleentheid maak en beoog om inwoners van die ouetehuise Helen Bellinghanhof en Coronation Memorial gratis na die fees te vervoer en ’n gratis ete te gee. ’n Skenking sal ook aan beide ouetehuise gemaak word.

Marais organiseer die fees op sy eie en doen alles op eie koste. “Die fees het geen winsmotief nie, en gaan suiwer om die liefde vir die saak,” sê hy.

“Ek kan met dank noem dat Dawid Pienaar van Kleinplaas en Niel Els van Turnberry my baie help met akkommodasie terwyl AIFA alle vervoer na en van Oudtshoorn borg.  Brian Minnie het sy verhoog en fasiliteit kosteloos beskikbaar gestel terwyl Johan Brooks die klank gaan hanteer teen ’n baie billike tarief. Die Oudtshoorn Aeroklub het hulle fasiliteite ook kosteloos beskikbaar gemaak vir Vrydagaand.”

’N BANKREKENING is vandeesweek geopen vir inbetalings om twee hoërskole van Oudtshoorn by te staan in ’n hooggeregshofsaak oor Christelike gebruike by die skole.

Die saak, wat deur die Organisasie vir godsdiensteonderrig en demokrasie (Ogod), teen ses skole in Suid-Afrika aanhangig gemaak is, gaan die ses skole na verwagting miljoene rande kos.

AfriForum het aangedui dat hulle ’n deel van die koste sal dek, terwyl elke skool versoek is om R50 000 in te samel.

Die twee skole op Oudtshoorn, die Hoërskool Oudtshoorn en Langenhoven Gimnasium, het besluit om saam te span om ’n bankrekening te open en die R100 000 in te samel.

Vir twee skole in ’n plattelandse gemeenskap soos dié van Oudtshoorn waar baie inwoners finansieel swaarkry, is dit ’n uitdaging om so ’n groot bedrag bymekaar te maak.

Die Hoorn sal weekliks ’n barometer plaas om aan te dui hoe die fondsinsameling vorder, met erkenning aan donateurs.

Bankbesonderhede: Bank: Nedbank

Rekeningnaam: Godsdienssaak Oudtshoorn Skole

Rekeningnommer: 2007594501

Takkode: 17520500

Spaarrekening

• Die Hoorn steun die voorskrifte van die SA Skolewet (84 van 1996), naamlik vryheid van die gewete en godsdiens in openbare skole, met godsdiensbeoefening wat op ’n billike wyse moet geskied en met die bywoning daarvan deur leerders en personeellede op vrye en vrywillige basis.

Deur Liesel le Roux

VOLGENS die memorandum wat dr Ivan Meyer, Wes-Kaapse DA-leier en kiesafdelingshoof van Oudtshoorn, Maandag aan die burgemeester van Oudtshoorn, Gordon April, oorhandig het, het Oudtshoorn ’n skuldlas van meer as  R100 miljoen wat al langer as 90 dae uitstaande is.

Onder die ander punte wat in die memorandum aangeraak word, is:

• Die versuim van die raad om ’n openbare deelnameproses te volg om die Geïntegreerde Ontwikkelingsplan (Integrated Development Plan  – IDP) of die begroting goed te keur;

• Vrugtelose en verkwiste uitgawes van R9,3miljoen – volgens die Ouditeur-Generaal;

• Die verhoging van eiendomsbelasting met 14%, die hoogste verhoging nog in Suid-Afrika;

• Geen burgemeesterskomiteevergaderings vanjaar en geen staande komiteevergaderings sedert November 2013 nie;

• Toekenning van tenders sonder dat die vereiste prosesse gevolg word;

• Die onwettige aanstelling van die waarnemende munisipale bestuurder en vyf departementshoofde;

•  Die aanstelling van persone in verskeie senior poste sonder dat die voorgeskrewe prosesse gevolg word, met senior lede van Icosa en die NPP wat werk gegee word; en

• Die burgemeester se onwettige aanstelling van Drewan Baird as sy persoonlike raadgewer teen ’n “astronomiese” vergoeding wat reeds heelwat meer as R1miljoen beloop.

Die burgerlike organisasies AfriForum, die Oudtshoorn Belastingbetalersvereniging (Orpa) en die Oudtshoorn Burgerlike Beweging (OBB) het op hul beurt verskeie dokumente tydens die optog aan Meyer oorhandig.

Dit sluit ’n versoekskrif om die dorp onder administrasie te plaas, ’n kritiese analise van die situasie op Oudtshoorn en ’n memorandum met kwelpunte oor die bestuur van die munisipaliteit.

Onder die sake wat deur die organisasies uitgelig word en kommer wek, is die finansiële toestand van die Oudtshoorn Munisipaliteit, gebrekkige dienslewering, ’n gebrek aan openbare deelname en terugvoer op navrae, korrupsie en wanbestuur asook die wyse waarop tenders toegeken word.

• Vuyani Mashini, ANC-voorsitter van die Wes-Kaap, het aan SABC-nuus gesê dit is nutteloos vir die DA om ’n optog te hou na ’n ANC-beheerde raad, en dat die DA eerder ’n proses moet “toelaat” vir ’n tussenverkiesing om plaas te vind sodat daar op so ’n wyse bepaal kan word wie die dorp moet regeer.

’n Deel van die skare wat Maandag na die Oudtshoorn Munisipaliteit gestap het en onder leiding van die DA gevra het vir die herstel van demokrasie op Oudtshoorn. Daar is ook gevra dat die dorp onder administrasie geplaas word. Foto: Schalk le Roux

Deur Liesel le Roux

’N VERSOEK dat Oudtshoorn onder administrasie geplaas moet word, is Maandagoggend tydens ’n protesoptog by die Oudtshoorn Munisipaliteit met ’n groot gejuig deur die skare begroet.

Sowat 1 500 mense het na die munisipaliteit opgeruk om te vra vir die herstel van demokrasie op die dorp. Die optog is geïnisieer en gelei deur die Wes-Kaapse DA-leier en kiesafdelings-hoof vir Oudtshoorn, dr Ivan Meyer. Dit is gesteun deur die gemeenskapsorganisasies AfriForum, die Oudtshoorn Belastingbetalersvereniging die Oudtshoorn Burgerlike Beweging en Residents for Change.

Met hul aankoms by die Burgersentrum kon optoggangers eerstehands ervaar dat die leierskap by die munisipaliteit nie ’n saak het met die demokratiese regte van inwoners nie. Hoewel dit ’n wettige optog was, is die trappe voor die ingang aanvanklik deur ondersteuners van die regerende ANC/Icosa/NPP­alliansie beset en is luide musiek en toesprake kort-kort deur die munisipaliteit oor vier groot luidsprekers gespeel om te verhinder dat optoggangers met hul program kon voortgaan. Die luidsprekers was bokant die ingang geïnstalleer.

Die trapbesetters is vreedsaam deur die Polisie van die trappe verwyder, terwyl optoggangers telkens met groot geduld gewag het vir die luidsprekers om stil te raak. Die wenkbroue het ook gelig oor twee persone met videokameras wat die skare en gebeure vanuit vensters op die boonste verdieping van die munisipale gebou afgeneem het.

Meyer het in ’n toespraak nie doekies omgedraai oor die situasie by die munisipaliteit nie en gesê dit is soos ’n satellietkantoor vir Nkandla.

“Genoeg is genoeg. Ons is moeg vir dirty tricks en korrupsie!” het hy gesê.

Hy het ook kaalvuis onder Drewan Baird, die sogenaamde raadgewer wat deur burgemeester Gordon April aangestel is, ingeklim en gesê Baird is daagliks met ’n geknoeiery by die munisipaliteit besig.

Meyer het ’n memorandum aan April oorhandig en gesê daarin word gevra dat korrupsie en wanadministrasie by die munisipaliteit gestaak moet word.

George Kersop, voorsitter van die Oudtshoorn-tak van Afriforum, het namens die betrokke gemeenskapsorganisasies ’n versoekskrif, gerig aan die Wes-Kaapse premier, aan Meyer oorhandig. Luidens die versoekskrif, wat volgens Kersop op etlike maande se ondersoekwerk gegrond is, is gemeenskapsorganisasies bekommerd oor die verval van die dorp en vra hulle dat Oudtshoorn onder adminisitrasie geplaas word sodat die dorp weer vooruitstrewend kan raak.

DIE gelukkige leser van Die Hoorn wat in verlede week se sms-kompetisie ’n kaartjie gewen het na die optrede van die kosskrywer Niël Stemmet Saterdag (27 September) in die Jamstreet Plaasteater, is Bets van Schalkwyk van Oudtshoorn.

Baie geluk, Bets! Jy kan jou kaartjie vir dié besonderse geleentheid sommer die oggend by Jamstreet kry. Stemmet, die skrywer van die kosboeke sout+peper en agter+blad, is op Oudtshoorn vir ’n Erfeniskoskuier saam met inwoners van die streek en die bekendstelling van sy nuutste boek.

Die persverklaring oor Niël lui: agter+blad is meer as ’n kook+boek, dit is ook ’n storie+boek, ’n foto+boek, ’n kos+boek, ’n onthou+boek, ’n erfenis+boek. Mense landwyd staan tou om Niël se optredes by te woon.

In agter+blad sit hy nie net die segetog voort wat hy met sy debuut, sout+peper, behaal het nie, hy vul ook hierdie versameling stories aan met briewe van geïnspireerde lesers.

Eenvoud is ook belangrik vir hom. Hy glo dit moet ’n lewenswyse word. Niël vertel van die ou mense wat gordyne toegetrek het teen die hitte. Waarom doen ons dit nie? Dis ’n manier om ons begroting te laat klop. Dié nederigheid kom ook in die resepte in sy boeke voor – terug na die dae voor onnodige byvoegings.

Hy glo daarin om kos suiwer te hou, en die smaak van die oorspronklike resep te behou. Om weer eenvoudige kos, soos in die verlede, te maak.

Erfeniskoskuier begin 10:30. Kaartjies is te koop by PNA en Môi Art Cafe (langs Karoopot).

DIE De Rust Ekofees, ’n viering  van die Klein Karoo-omgewing, het gister (24 September) afgeskop en duur nog tot Sondag (28 September).

Dié fees, wat geïnisieer is deur dr Suzanne Delport van Pretoria, bied weer vanjaar sprekers van heinde en ver om lesings aan te bied oor alles wat eg is aan die Klein Karoo.

Temas wissel deur die loop van die program en sluit alles in van sonenergie en hidroliese breking tot voëls, blomme, reptiele, plante, sterrekunde en nog vele meer.

Sprekers is onder meer Hennie Maas en Wim Filmalter wat oor die sterreryk gaan gesels en Paul Rixom en Gerard Germs wat meer oor die geologie gaan vertel.

Johan Marais se onderwerp is reptiele en Chris Lee gaan ’n aanbieding doen oor klippe en minerale.

Vir besprekings kan Gwen by 072 292 4103 geskakel word.

Die program is beskikbaar by www.derusteco.co.za.

DROOM vir Oudtshoorn, ’n vrywillige groep vir alle inwoners wat omgee vir die dorp, skop die komende naweek weer af.

Volgens Madeleine Miles gaan inwoners van Buitekantstraat en omgewing in Wesbank die parkie op die hoek van Buitekantstraat en Kortstraat oor die volgende paar weke verfraai.

“Almal kom Satermiddag om tweeuur in die parkie bymekaar om te beplan en te bespreek.  Enige inwoners wat ou bande, pale, verf, of iets soortgelyks het wat gebruik kan word vir klimrame kan ons laat weet.”

Miles sê die “dromers” sal ’n plan maak om dit wat inwoners kan skenk, te gaan oplaai of laat weet waar dit afgelewer kan word.

“Ons gaan ook blomme plant in die parkie en vra asseblief steggies van malvas, vetplante of ander plante wat min onderhoud benodig.”

Werk in die parkie skop amptelik op Saterdag, 4 Oktober, af. Nadat almal saamgewerk het, gaan ons almal sommer ook lekker in die parkie braai.”

Deur Garnett Wicomb

DIE verhoor van die voormalige voorsitter van die Oudtshoorn Besigheidskamer, Erasmus Petrus (Rassie) Kleyn, is Vrydag in die Oudtshoorn Streekhof  tot  22 Oktober uitgestel.

Kleyn staan tereg op 71 aanklagte van bedrog, alternatiewelik diefstal.

Hy was die eienaar van Oudtshoorn Rekenkundige & Finansiële Dienste BK, en word daarvan aangekla dat hy Camelus Voere BK van dr Stefanus Cilliers met miljoene rande bedrieg het.

Cilliers het Vrydag begin getuig en het breedvoerig vertel hoe hy sy voerbymiddelbesigheid, Camelus Voere, in 1994 in sy motorhuis begin en stelselmatig uitgebrei het. Hy het vir Kleyn later ontmoet en hom as sy boekhouer aangestel. Die produk wat hy ontwikkel het, was ’n eerste in die wêreld.

“Dit het die kwaliteit van volstruise so verbeter dat hulle tussen agt en nege maande in plaas van eers ná 14 maande geslag kon word.”

Kleyn het hom later aangemoedig om die besigheid na die buiteland uit te brei en die rande het ingerol. Kleyn het hom ook voorgestel aan Dries van Rooyen wat die produk oorsee bemark het.

“Hy het die indruk geskep dat hulle twee finansiële konsultante was.

“Ek kon sien hoe die geld meer word en mnr Kleyn het my baie goeie raad gegee. Hy het my gemotiveer en wou my besigheid help uitbrei.”

Sy vertroue in Kleyn het so toegeneem dat hy die betaling van salarisse aan hom toevertrou het, het Cilliers getuig.

Die saak voor streeklanddros Mark van Wyngaard wat bygestaan word deur ’n assessor en afgetrede rekenmeester, Geoff Stenekamp, is uitgestel met Cilliers nog in die getuinebank.

Adv Louis van Niekerk is die staatsaanklaer