DIE pa en seun van Oudtshoorn wat op altesame 43 klagtes van bedrog skuldig bevind is, Daniel en Edward Zaayman, is Maandag in die Oudtshoorn Streekhof elk tot 15 jaar tronkstraf gevonnis. Hulle het skuldig gepleit op die klagtes van bedrog.

Daniel Zaayman (43) het skuldig gepleit op 23 aanklagte, waarvan 12 dat hy hom as prokureur voorgedoen het.

Edward (23) het skuldig gepleit op 20 aanklagte vir die slinkse koop en verkoop van voertuie asook die verkoop van goedere soos motorbootenjins wat hy in werklikheid nie besit het nie.

Hy het aan motorhandelaars voorgegee dat hy die geld vir die voertuie via die internet sou betaal en het dan vervalste oorplasingstrokies verskaf.

DAAR was baie pret, baie plesier en boonop uithalergeregte by Die Hoorn se Buitelugkos-kompetisie wat Saterdag by die Oudtshoorn Aeroklub plaasgevind het.

Die wenners van Saterdag se Buitelugkos-kompetisie was die Hazenjacht Boerdery-span van Elsabé Greeff (tweede
van regs) en Johan de Villiers (derde van regs). By hulle van links is Niel Els (beoordelaar), Anton le Roux (bemarker
by Die Hoorn en organiseerder van die kompetisie), Erna “Helen Zille” Schnautz en Jaco Matthee (beoordelaar).

Die kompetisie tussen die onderskeie spanne was voorwaar straf en die Oudtshoorniete het gewys dat hulle weet hoe om in die buitelug oor ’n vuur kos te maak.

Die wenspan was die span van Hazenjacht Boerdery wat bestaan het uit Elsabé Greeff en Johan de Villiers.

Hulle het ook die prys gewen vir die beste voorgereg.

Hul wengeregte was eerstens ’n voorge­reg van murgbene, skaapribbetjie, roosterkoek en groenvye.

Die hoofgereg het bestaan uit ’n ontbeende skaapboud gestop met spinasie, knoffel, spek en feta- en bloukaas wat op die spit gebraai is en bedien is saam met patats wat in foelie op die vuur gaargemaak is, ’n gemengde groentegereg wat op die vuur gemaak is en ’n groenslaai.

“Dit was ’n heerlike dag,” het ­Greeff ná die tyd gesê. “Dit was goed vir die gees om weg te kom van die huis na ’n ander plek en om met ander en nuwe mense te kuier wat jy nie aldag sien nie.”

Die naaswenners was die B Co-span bestaande uit Belinda du Plessis en Corné Coetzee.

Hulle het ’n beesstertpotjie voorberei saam met ’n Marokkaanse gemmerpatatgereg met Amarula-sous.

Vir dié besonderse bygereg het hulle ook die prys gewen vir die beste bygereg van die dag.

Die wenner van die derde prys was die Klokkedore!

Dié span van Johan Kriegler (Kraggies) en Dawie Smit het ’n heel Karoopersielamsblad met groente en port in ’n swartpot op die vuur gaargemaak.

Hulle het ook gesorg vir iets soet met ’n telefoonpoeding wat op die vuur gebak is.

Die span met die beste spangees was die Oudtshoorn Grassnyers van Elmine Coetzee en Vasti Greeff.

Die span met die beste “gadgets” was die span van Piet Badenhorst en André du Plessis, terwyl die span van Frik Pieterse die prys gewen het vir die beste musiek met die konsertina en kitaar wat hulle laat saamgesels het.

Tydens die geskerts van die dag is ver­skeie deelnemers en besoekers wat effens op bekendes trek, die dag herdoop en het hulle later onder groot gelag help pryse uitdeel. Onder hulle was Erna “Helen Zille” Schnautz, André “Willie Nelson” du Plessis, Gerbrandt “Danny de Vito” van Deventer en Jacques “Keanu Reeves” Conradie.

• Elke span wat aan die kompetisie deelgeneem het, is huis toe met ’n wonderlik prys danksy die volgende vrygewige borge:

De Krans, CP Nel Motors, Trentyre, Kango Volstruisplaas, Swartberg Hotel, Cecil Badenhorst, Supa Quick, The Showroom, Joubert Tradauw, Wieldokter, Highgate Volstruisplaas, Slabber & Slabbert, Lugro Ostrich, Klein Karoo International, Turnberry Boutique Hotel, Eagle Falls Country Lodge, Village Art Galery, Landmark, Santa Fé Spur en Wilgewandel.

Weerlig speel laataand Dinsdag oor Oudtshoorn. Die reën wat met dié donderstorm gepaard gegaan het, het gehelp om verskeie brande in die Outeniqua- en Swartberge rondom Oudtshoorn te blus. Die brande is juis Maandagmiddag op verskeie plekke deur weerlig veroorsaak en aangejaag deur wind. Teen Dinsdagmiddag was Oudtshoorn gehul in ’n digte rookkombers. Dié foto is vanaf die reservoir op Grootkop in die rigting van die Swartberge geneem. Foto: Wilmar Matthee

Deur Liesel le Roux

OUDTSHOORN en ander dele van die Klein Karoo was Dinsdag in ’n rookwolk gehul met roet wat oral neergesif het nadat verskeie brande in die Swartberge en die Outeniquaberge die vorige middag uitgebreek het. Brande het gewoed in die Outeniquaberge, onder meer by Ruiterbos op die Robinsonpas, asook by Matjiesrivier in die omgewing van die Swartbergpas, in Gamkaskloof en Gamkaspoort asook in die Seweweekspoort naby Ladismith.

Die brande is veroorsaak deur donderstorms Maandagmiddag en is Dinsdag aangejaag deur winde.

Volgens Justin Lawrence, skakelbeampte van CapeNature, het die donderstorm en goeie reën van Dinsdagaand egter al die brande geblus. Geen skade is aan eiendom aangerig nie. CapeNature moes Dinsdag ’n groot brandspan na Matjiesrivier stuur nadat die brand weerskante van die Swartbergpas gewoed het. Hulle is bygestaan deur ’n span van Working on Fire van Ladismith.

Die Oudtshoorn Brandweer was ook in die omgewing met die opdrag om alle eiendom te beskerm indien die brand dit sou bedreig. Die Swartbergpas moes Dinsdag gesluit word omdat dit te gevaarlik geword het vir gebruik deur voertuie. Dit het onder meer ’n stokkie gesteek voor ’n groep buitelandse toeriste se begeerte om via die Swartbergpas na Prins Albert te reis.

(Foto onderskrif: Die wenners van Saterdag se Buitelugkos-kompetisie was die Hazenjacht Boerdery-span van Elsabé Greeff (tweede van regs) en Johan de Villiers (derde van regs). By hulle van links is Niel Els (beoordelaar), Anton le Roux (bemarker by Die Hoorn en organiseerder van die kompetisie), Erna “Helen Zille” Schnautz en Jaco Matthee (beoordelaar).)

Nico Geldenhuys

Deur Higgo Jacobs

DIE bekende en gewilde eienaar van Headlines op Oudts­hoorn, Nico Geldenhuys (62), het Saterdagaand in sy geliefde restaurant aan ’n hartaanval gesterf.

Geldenhuys het volgens ’n vriend, Charlie Nunn, in ’n stadium die aand gekla dat hy nie lekker voel nie en is later deur ’n personeellid by ’n badkamer gevind. Mediese hulp is na die restaurant ontbied, maar Geldenhuys was reeds oorlede.

Inwoners het met skok op die dood van dié bekende sakeman en rugby-afrigter gereageer.

Baie het hul hartseer oor Geldenhuys se dood op Die Hoorn se Facebookblad uitgespreek. “Oom Nico was iemand om na op te kyk. Oom se plekkie gaan leeg wees.” – Magda Berry, en “So jammer om te verneem. Baie goeie mens gewees.” – Dalene Julies, was onder die meer as 50 boodskappe op dié blad.

Hy het in 2010 ’n massiewe hart­aanval gehad, maar het goed herstel.

Geldenhuys, wat bekend was vir sy deernis vir mense en groot werkywer, het saam met sy vrou, Hannatjie, Headlines 24 jaar gelede begin. Hulle was die eerste restauranteurs wat volstruisvleisgeregte op hul spyskaart geplaas het. Geldenhuys het diep spore in rugbykringe in die SWD en op Oudtshoorn getrap. Hy was ’n erelid van die Oudtshoorn Rugbyvoetbalklub. Jacques Swart, huidige afrigter van dié klub, sê hy het as kind saam met sy pa na wedstryde op die Rec gaan kyk toe Geldenhuys die afrigter van Oudtshoorn en die SWD was. “Hy was nog altyd een van my rugbyhelde. Vanjaar het ek die voorreg gehad om langs hom te staan en eerstehands van hom te leer. Al die krediet van ons sukses vanjaar moet aan oom Nico gaan.” Geldenhuys was ook ’n geesdriftige rolbal- en gholfspeler. Hy was ook lank lid van die Oudtshoorn Rotariërs. Volgens Hannatjie het hy in 2010 tot bekering gekom en sedertdien elke dag soos ’n kind van die Here geleef en oral van die liefde van Jesus getuig. ’n Begrafnisdiens vir Geldenhuys vind Vrydag om 13:00 in die NG Gemeente Park op Oudtshoorn plaas. Geldenhuys word oorleef deur sy vrou, Hannatjie, twee dogters, Sanet en Ilze, ’n seun, Marthinus, en vier klein­kinders, Francois, Nina, Inge en Lize.

Eben White (links) en Nico Emmerich wat met ’n 1984 Nissan 1400-bakkie aan die Bull Run gaan deelneem. Die volstruis gaan saam!

DRIE “senior” voertuie van Oudtshoorn en hul eienaars het gister die pad aangedurf na Vosburg in die Noord-Kaap waar hulle aan die jaarlikse Wegry Bull Run op ’n pan naby die dorp gaan deelneem.

’n Voorvereiste vir deelname is dat die voertuig waarmee jy deelneem, ouer as 30 jaar moet wees.

Die Oudtshoorn-deelnemers is Eben White en Nico Emmerich in ’n 1984 Nissan Champ 1400-bakkie; Francois Brill in ’n 1983 Mercedes-Benz 200; en Jaco Vorster in ’n 1978 Mercedez-Benz 300 D.

Die Bull Run is nie net daarop gemik om deelnemers se bestuursvaardighede en vindingrykheid om hul motors op die pad te hou te toets nie. Daar gaan ook verskeie pretitems soos rieldanse en bokdrolspoeg wees waaraan deelgeneem moet word.

Vorster sê hy het al van skooldae ’n passie vir motors en enjins. Die 300 D waarmee hy en ’n goeie familievriend, Morné Janse van Rensburg, gaan deelneem, is sy vyfde outydse Mercedes-Benz. Hy het voorheen al ’n 1975 280; ’n 1970 280 SE 3,5; ’n 1989 300 SL en ’n 1985 280 SE gehad. Vorster sê hoewel hulle albei gaan bestuur, is hy die meganikus. Sy pa, Leon, het vir hom ’n “tool box” gepak. “Morné moet die bokdrolspoegitem vir ons doen.”

White het gister gesê hulle gaan nie noodwendig om die byeenkoms te wen nie, “maar die mense gaan beslis van ons weet, en ons gaan íéts wen!” White sien veral uit na die rieldans. White sê hy het die Nissan-bakkie waarmee hy gaan deelneem, van sy pa geërf.

Brill, wat twee vriende van Kaapstad, Ricky Serfontein en Ruan de Kock, saamvat, vertel hy het sy geel Benz gekoop by Jan Adriaan Korff van die musiekgroep Melktertkommissie, wat dit gebruik het as hulle gaan toer. Brill gaan ook namens die Oudtshoorn Vryburgers kospakkies en Bybels uitdeel op pad na die Bull Run.

• Wat die Bull Run betref, is nog ’n voorwaarde van inskrywing dat die waarde van herstelwerk vir die ren nie R20000 mag oorskry nie.

Die naweek se deelname geskied op ’n puntestelsel. Punte word toegeken vir hoe oud ’n voertuig is en ook hoe gehawend dit is! Die is dus nie juis ’n voordeel om ’n voer­tuig sonder enige foute te hê nie, aangesien punte ook toegeken gaan word vir herstelwerk langs die pad, want elke voertuig se Bull Run begin by sy tuisdorp of -stad. Op pad na Vosburg kan punte verdien word deur so ver as moontlik grondpad te ry.

Vierdeur-sedans kry ekstra punte, maar hoe groter die enjin is, hoe meer punte word weer afgetrek.

Punte word ook toegeken aan die oorspronklikheid van spanne wat volgens ’n tema aantrek en hul voertuie versier.

Punte word laastens toegeken vir deelname aan 10 items.  Dié items sluit in:

• Kwartmyl: Deelnemers word een vir een afgesit en die tyd word geneem.

• 8-eruitry: Deelnemers moet teen tyd agteruit om ’n figuur-8 baan ry.

• Bokdrol spoeg: Deelnemers se spoeg- en jaagvaardighede word op ’n ovaalbaan getoets.

• Gholf: Deelnemers se bestuursvernuf tussen kegels deur en gholfvaardighede word getoets.

• Gymkana: Deelnemers word getoets om skerp draaie en tussen kegels deur. Jy verloor punte as jy die kegels raakry.

• Visvang: Deelnemers ry teen tyd met vier emmers water met ’n stok en haak en moet so min as moontlik water mors.

• Rieldans: Deelnemers moet tot op ’n verhoog ry, uitklim en dans vir punte.

• Baan: Elke span moet teen tyd twee rondtes om die baan jaag en bestuurders na die eerste rondte omruil.

DAAR lê nog ’n lang pad voor vir die twee hoërskole van Oudtshoorn wat R100000 insamel vir ’n hooggeregshof­saak oor Christelike gebruike.

Die fonds wat geopen is om geld vir die Hoërskool Oudtshoorn en Langenhoven Gimnasium in te samel, staan ná twee weke op R12260. Dit is R4000 meer as verlede week.

Die twee skole het ’n ge­samentlike bankrekening geopen waarin bydraes inbetaal kan word.

Die bankbesonderhede is:

Bank: Nedbank; Rekeningnaam: Godsdienssaak Oudtshoorn Skole;

Spaarrekeningnommer: 2007594501

Takkode: 17520500.

• Die volgende inbetalings die afgelope week word met dank erken: Zondagh Familie R200; Charlie Thiry R500; Cesar Thiry R500; Anoniem   R1 000, Stander UNDL – Gim R1 000; Godsdienssaak Gim R200;  A Potgieter R1 000, Godsdienssaak Odn R100; Vriend R200; en Klue R300.

Ashley-Ann May, Petra en Dean Lategan van Latana Cheese wat pas vyf toekennings by ’n internasionale kaaskompetisie losgeslaan het.

Deur Liesel le Roux

’N KAASFABRIEK in Matjiesrivier waar nog net twee jaar lank kaas gemaak word, het gewys hulle kan saampraat met groot kaasmaatskappye dwarsoor die wêreld deur vyf toekennings by die World Jersey Cheese Awards te verwerf!

Latana Cheese is in 2012 deur Dean en Petra Lategan op ’n plaas aan die voet van die Swartberge sowat 47 km buite Oudtshoorn begin. Hulle het in 2008 vanaf Pretoria daarheen verhuis nadat Petra siek geword en kanker gekry het.

Die Lategans was vandeesweek nog oorweldig deur die eer wat hul kase by dié toekenningsgeleentheid te beurt geval het. Hulle het sewe kase ingeskryf. Hiervan het die boerenkaas (gewoon) en die joghurtballe silwer toekennings verwerf, en die feta, halloumi en die boerenkaas met groenpeper brons.

Hulle het nie eens van die kompetisie geweet nie, vertel Dean.

By die George Landbouskou het ’n man hulle genader nadat hy van hul kaas geproe het. Hy het hulle van dié kompetisie vir kaas, gemaak van Jerseymelk, vertel en aangemoedig om in te skryf.

Dié kompetisie wat elke jaar in ’n ander land aangebied word, is vanjaar op Stellenbosch gehou. Die beoordeling was op 12 September en die uitslae is op 22 September bekend gemaak.

Die kaasmakers is Dean met Ashley-Ann, wat deur hom opgelei is en intussen as volwaardige kaasmaker gekwalifiseer. Sy het al haar eerste kaas alleen gemaak.

Ashley-Ann het op die plaas grootgeword en dadelik in die kaasmakery belang gestel, vertel Dean.

Petra fokus op haar beurt meer op die administrasie en beplanning.

Latana se besonderse kase is te koop by Jamstreet se Saterdagmarkte en De Rust se Plaaswerfmark, terwyl hulle ook aan gas­tehuise en restaurante verskaf.

Deur Garnett Wicomb

DIE bedrogsaak teen die voormalige bestuurder van Kango Wyne op Oudtshoorn, Johan Brits, is Maandag in die Oudtshoorn Streekhof tot  20 Oktober uitgestel nadat die hof ’n aansoek om sy ontslag van die hand gewys het.

Geen redes vir die weiering van die aansoek is deur streeklanddros JC Nortje verskaf nie.

Brits se regsverteenwoordiger, adv Marthinus Barnard, het in die aansoek aangevoer dat die staat nie genoegsame getuienis aangebied het om sy kliënt skuldig te bevind nie. Brits het volgens hom in opdrag van die direksie van Kango Wyne opgetree en kan dus nie vir die vervaardiging en bemarking van ’n nuwe produk, “ale”, verantwoordelik gehou word nie.

“Kango Wyne as regsentiteit, en nie Johan Brits nie, moet eintlik in die beskuldigebank staan,” het Barnard betoog.

Volgens hom het Brits niks in die geheim gedoen nie en selfs aan ’n amptenaar van die departement landbou gesê dat hy besig was om ’n nuwe produk te vervaardig. Daar is ook geen getuienis voor die hof dat Kango Wyne verkeerd opgetree het nie en die veelbesproke “ale”-etikette is nooit voor die hof geplaas nie.

Barnard het ook aangevoer dat Kango Wyne gelisensieer was om wyn te vervaardig en nie die beskuldigde nie. Volgens hom is “ale” ’n wettige drank en bestaan daar geen voorskrifte oor wat die inhoud daarvan moet wees nie.

Voorts het Brits alle werknemers van Kango Wyne beskerm en deurentyd sy volle samewerking tydens die ondersoek gegee.

Al die staatsgetuies het bevestig dat Brits hulle meegedeel het hy tree in opdrag van die direksie op.

Volgens die staatsaanklaer, adv Louis van Nie­kerk, het die staat ’n prima facie-saak en is genoeg getuienis voor die hof gebring dat Brits wel bedrog gepleeg en werknemers geïntimideer het. Vrae deur werknemers aan Brits oor die vervaardiging en bottelering asook negatiewe reaksie vanuit die mark oor die nuwe produk is deur Brits in die kiem gesmoor en almal het getuig dat hulle bang was vir hom. Die argumentering van die verdediging is volgens Van Niekerk “onoortuigend en onlogies”.

“Volgens getuienis is dit duidelik dat Brits die konkoksie, of sogenaamde ale, bygevoeg het by wat vir die publieke mark bestem was en dat dit inderdaad na verskeie drankwinkels versprei is, as sou dit die bekende wynprodukte van Kango Wyne wees.

“Dit is nie te betwyfel dat hier ’n prima facie- saak van bedrog is rakende die voorgee aan die publiek dat hierdie vermengde wyn, opgemaak uit al groter wordende hoeveelhede “ale”, as nakoming van die bepalings van Wet 66 van 1987 was, as wyn wat slegs uit ’n druifbasis bestaan en dus so op etikette voorgehou is.”

Brits staan tereg op 23 aanklagte van bedrog, drie van oortreding van die Wet op Drankprodukte en twee van intimidasie.

Deur Garnett Wicomb

’N 46-JARIGE Chinese burger, Guoshun Gao (46), het vlugtig in die landdroshof op Oudtshoorn verskyn op aanklag dat hy by ’n sameswering betrokke was om Julia Bagley, voormalige eienaar van die nagklub Bagley’s, te vermoor.

Die saak teen Gao is deur landdros  Lorraine Samuels vir ’n formele borg­aansoek tot 7 Oktober uitgestel. Gao het in slegs ’n lang onderbroek in die hof verskyn.

Volgens kapt Louis Visser, kommunikasiebeampte van die Oudtshoorn Polisie, het Gao na bewering op Maandag, 22 September, twee mense op Pacaltsdorp genader om ’n misdaad te pleeg en hulle na Oudtshoorn gebring.

“Die Polisie het daarvan te hore gekom en nadat die saak ondersoek is vir Gao in hegtenis geneem.”

Bagley’s is ’n tyd gelede verkoop, maar die besigheid se deure is deur die Polisie gesluit omdat die oordrag van die lisensie na die nuwe eienaars nog nie goedgekeur is nie en die nuwe eienaars dus nie tans wettig met drank kan handel dryf nie.

Deur Liesel le Roux

ONTEVREDENHEID oor dienslewering en korrupsie by die Oudtshoorn Munisipaliteit is die redes vir ’n ANC-massa-optog op Oudtshoorn wat die Patric Madikane-tak van die ANC in Bongolethu vir Maandag (6 Oktober) organiseer.

Die optog vertrek om 11:00 van die Alpha Teater. By die munisipale gebou in Voortrekkerweg sal ’n memorandum aan die burgemeester, Gordon April, oorhandig word.

Inwoners is veral ontevrede oor dienslewering, elektrisiteit wat afgesny word en die dorp se infrastruktuur wat nie onderhou word nie, sê die tak-sekretaris, Jongilizwe Tyatya. Volgens hom is inwoners ook ontevrede met die wyse waarop die waarnemende munisipale bestuurder, Ronnie Lottering, die dorp bestuur. “Ons wil hê dat hy die pos moet ontruim,” sê Tyatya.

“Met bekwame persone aan die stuur van sake by die munisipaliteit sal inwoners weer kwaliteitdiens ontvang,” sê Tyatya

Op plakkate waarin die optog geadverteer word, word gevra dat Lottering verwyder moet word. Ronnie Lottering must go! Weg met Ronnie! lees die plakkate onder meer.

’n Uitnodiging word aan mense gerig, ook nie-ANC-lede, om die optog in groot getalle te ondersteun.

Mia le Roux van Oudtshoorn wat Saterdagaand as Mej Tuinroete en Klein Karoo by ’n glansfunksie in die Garden Route Casino in Mosselbaai gekroon is. Foto: Anton Alberts Photography

Deur Liesel le Roux

DIE Mej Tuinroete & Klein Karoo-titel behoort vanjaar aan Mia le Roux (19) van Oudtshoorn!

Mia het Saterdagaand die eerste Oudtshoorniet geword om in die 11-jarige bestaan van dié kompetisie as Mej Tuinroete & Klein Karoo gekroon te word.

Mia is ook tydens die gala-aand by die Garden Route Casino in Mosselbaai as Mej Fotogenies aangewys. Leanka Laubscher (23) van George, ’n dansinstruktrise, is aangewys as eerste prinses en Mej Persoonlikheid, terwyl Cindy Ndlangmandla (20) van George, ’n student aan die NMMU, die tweede prinses was.

Mia, wat sedert haar babadae heeltemal doof is, het op twee jaar ’n koglêere inplanting in haar regteroor gekry en hoor klanke met die hulp van die 22 elektrodes wat die rol van die gehoorsenuwees vertolk.

Sy wil nie Oprah of Prinses Diana wees nie, maar net haarself, het Mia gesê toe die beoordelaars haar tydens vraetyd Saterdagaand gevra het wie van dié twee vroue sy sou wou wees.

Sy het aan die gehoor vertel dat sy doof is en dat die Here haar daardeur nederig gemaak en haar hart oopgemaak het vir liefde vir mense wat dit nodig het.

“Ek wil mense inspireer dat jou omstandighede nie ’n verskoning is om nie jou drome te volg nie. Dit is ook my boodskap aan die vroue en kinders by die vier skuilings vir mishandelde vroue en kinders waarheen die fondse gaan wat met die kompetisie ingesamel is.”

Volgens Mia was dit juis die feit dat die kompetisie die skuilings in Mosselbaai, George, Oudtshoorn en Knysna steun, wat haar laat besluit het om deel te neem.

Mia, Leanka en Cindy kwalifiseer nou almal om aan die volgende Miss Earth SA-kompetisie deel te neem.

Mia sê sy is nog nie seker of sy daaraan gaan deelneem nie, omdat sy ook droom om in ’n stadium aan die Mej Dowe SA-kompetisie deel te neem.

“Soos alle jongmense het ek baie drome. Die feit dat ek met mense normaalweg kan kommunikeer, plaas my in ’n unieke situasie – ek het ’n voet in die horende wêreld en ’n voet in die dowe wêreld. Ek wil graag  studeer in ’n rigting soos dieetkunde of menslike bewegingskunde. Maar ons sal nog sien wat die toekoms vir my inhou.

“Deur te kwalifiseer vir Miss Earth SA, het ek baie opsies en besluite om te neem. Ek droom ook daarvan om eendag te reis en die wêreld te sien.”

Sy sê die kompetisie het aan haar bevestig dat waar sy ook al gaan, daar altyd iemand sal wees wat bereid is om haar te help as sy iets nie mooi verstaan nie.

Mia is ’n oudleerder van die  Laerskool Van Reede, Principia Kollege en die Hoërskool Oudtshoorn, waar sy in haar matriekjaar in 2013 Mej Struisie was.

• Twee ander jong Oudtshoorniete was ook onder die 12 finaliste en het ook Saterdagaand Oudtshoorn se naam hoog gehou.

Sherelle Joubert (19) het die topvyf gehaal, terwyl Tersia Willemse (20) aangewys is as Mej Liefdadigheid nadat sy die meeste kaartjies vir die gala-aand verkoop het.

Mia en Sherelle het albei hul eerste tree op die loopplank by die Panache Akademie van Verite Ann du Toit op Oudtshoorn gegee.

Memorandum handed tot the Greater Oudtshoorn Municipality on Monday, 6 October 2014:

We members of the African National Congress in particular led by Patrick Madikane Branch joined by the communities of Bongolethu, Bridgton, Dysselsdorp, De Rust and all other rurals areas in boundary of the Greater Oudtshoorn Municipal Area, we have come together because of our common and shared interest of our town and subsequently municipality.
2.
For far too long we have observed with great sadness and regret how our municipality has been run down the drain and plundered into bankruptcy by some elements in this unfortunate coalition government to the detriment of our beloved and mighty organization.
3.
It has been evident that governance has collapsed in this municipality as the Council has failed to meet for a period of more than a year to discharge its legislative responsibilities and mandates including but not limited to the appointment of the Municipal Manager, the Chief Financial Officer and all other Senior Management positions.
4.
As a consequence of poor governance and lack of leadership at Council level, the Administration has become a dominant player, to the extent that the Acting Municipal Manager is exploiting and manipulating processes such that the Council in most instances reports and hold its Caucuses at the Office of the Acting Municipal. The conflicting roles played by the Acting Municipal Manager, that of holding a Senior Position in the NPP and heading the administration of the municipality, enables him to control and undermine Councillors and consequently influences them into taking decisions that are not in the interest of the municipality and that of the town, but rather decisions that aimed at protecting him and the position that he occupies illegally.
5.
In the past three years we have seen our municipality governed through the courts and exorbitant amounts of monies are being spent on legal fees, to an extent that lawyers have camped in our municipality. All these legal battles happen at the expense of our poor people, and service delivery is heavily compromised. Again it is our belief that this is not done in the interest of our town, but only to protect the Acting Municipal Manager and all the mess he is causing in this municipality each and every day.
6.
Accordingly, we herein wish to raise our demands to the Executive Authority of the Municipality which is the Municipal Council on the following.

1. WE NEED IMPROVED LEVELS OF SERVICE DELIVERY
1.1 Electricity is a basic service delivery matter, therefore provisions of electricity is one of the key elements and focuses in the election manifesto of the ANC, particularly to the poor people. In the past we have seen household’s electricity being cut off due to non-payment of rates and services. While we agree in principle that generally people should pay for such, we are however opposed to the fact that our people must be reaped off in the manner they are currently experiencing. They are being asked to pay thousands of rand and although they do not have these kinds of monies, they are being pressured to make such high amounts of payments to generate more money for the municipality, because Mr Ronnie Lottering and his cronies have squandered and finished the money in this municipality. Therefore our people should not be forced to pay monies to feed their habits and pay for their contracts.
1.2 We accordingly call upon the Council to put a moratorium on the cutting of the electricity until the situation is stabilized. Access to electricity is a constitutional right of all residents of this town and South Africa. When one is being denied access to purchasing electricity because of non-payment of municipal rates is a violation such rights.
1.3 That all the accounts of the poor people that were handed over to lawyers should be withdrawn from them and explore other methods for debt collection, which would be constituent with their conditions.
1.4 The road infrastructure in our town has deteriorated particularly in our townships, and the cleanness thereof.

2. CORRUPTION IN THE MUNICIPALITY
2.1Corruption is one evil that kills and robs our people of their rightful services and resources. It has become a norm in this municipality that the supply chain processes are being ignored, undermined and abused.
2.2 We believe several contracts worth millions of rand have been awarded without any due process.
2.3 The Cango Caves R18 million which was spent in an unprecedented and questionable manner, is the latest of the squabbles in this municipality.
2.4 In this regard we call upon the Mayor to immediately write to the President of the Republic of South Africa to activate and assign the Special Investigation Unit (SIU) to investigate all this corruption in this municipality.

3. MALADMINISTRATION IN THE MUNICIPALITY
3.1 For the past 3 years we have been seen a municipality that is deteriorating up to no decimal point and unacceptable levels.
3.2 The continuous unprocedural appoints to positions that are not in the organizational structure or staff establishment, without any role.
3.3 The appointment of people without any suitable qualifications in the key strategic positions.

4. NEPOTISM
4.1 Awarding of contracts based on friendship with the Acting Municipal Manager as well as association with political parties.
4.2 The operation of the municipality without a proper budget as such monies are being shifted left, right and centre without any due process and decision making.
4.3 There are high levels of unauthorised and irregular expenditure in the past three (3) years.

5. CONCLUSION
5.1 It must be noted that these demands are not subject to negotiations but for immediate implementation, and we are not going to rest until these demands are met. If needs be we will come back and occupy this Municipality and render this town ungovernable.
5.2 As the community of Oudtshoorn we believe the time has come and that time is now. We should restore good governance, the authority of the Council and adherence to legislative prescripts though the separation of functions and roles of both the Council and the administration. The Council must seat in terms of the law to immediately consider all the issues raised in this memorandum, as representatives elected and mandated by the people of Oudtshoorn.
5.3 We would like to state it on record Mr Mayor and your council that we give you seven (7) days to attend and act positively on our demands, in simple terms we call upon you to act swiftly and remove Mr Ronnie Lottering immediately

Deur Garnett Wicomb

UITSPRAAK in die diefstalsaak teen ’n voormalige kassier by die Oudts­hoorn Munisipaliteit  is verlede  Vrydagoggend  in die Oudtshoorn streekhof vir nog ’n maand uitgestel.

Die 28-jarige Carol Ann Lewis van Dysselsdorp word daarvan aangekla dat sy tussen 28 Augustus  en 30 Oktober 2010 R152 076 van die munisipaliteit gesteel het terwyl sy in beheer was van geld wat betaal is vir water, elektrisiteit en ander dienste.

Sy ontken skuld op die aanklag. Streeklanddros JC Nortje het die saak tot 7 November 2014 uitgestel omdat hy nog nie gereed was om uitspraak te lewer nie.

Mnr Corné Pretorius verskyn vir die staat en me Cindy Smith in opdrag van die regshulpraad namens Lewis.

Deur Marlene Malan

OP die hakke van die pas afgelope Prins Albert Kunsfees (PArt 2014) volg dié dorp se Leesfees wat beloof om vanjaar die beste ooit te wees.

Die derde Prins Albert Leesfees, van 7 tot 9 November, het van die land se topskrywers en talle veelbesproke boeke en onderwerpe gelok.

Dit sluit in Francois Smith, wie se Kamphoer onlangs gepubliseer is;  asook Dennis Cruywagen met Brothers in War and Peace oor die bekende tweeling Constand en Abraham Viljoen; Thomas Mollett met Bloody Lies oor die onopgeloste en opspraakwekkende moord op Inge Lotz;  Eldridge Jason met Gerook, wat handel oor bendes sowel as drank- en dwelmverslawing; Marthie Maré met Legkaart van jou gesig/ Your Face Puzzle oor die invloed van jou gelaatstrekke op jou persoonlikheid; Carol Campbell met Esther’s House, ’n roman oor die agterplaasbewoner Esther Gelderblom van Oudtshoorn; die volkekundige en kultuurkenner Mathilda Burden met haar boek Ou-Kaapse  Meubels; Daniel Hugo met sy vertaling van die digbundel Die Roebaijat van Omar Khajjam; asook besprekings van onder meer die nuwe roman van Marguerite Poland, The Keeper, wat deur Hugo as Die Bewaker vertaal is.

Die skrywer Anzil Kulsen en Jason gaan op Vrydag (7 November) spesiale lees-en-skryfprogramme by die plaaslike hoёr- en laerskool aanbied.

Die fees open die Vrydagaand (18:00) met die bekendstelling van die pragboek A Cultural History of Prince Albert: An Album Celebrating the Unique Culture of the Town and its Cultural Landscape.

Volgens die Leesfeeskomitee, on­der voorsitterskap van Linda Jaquet, moet jy nou al Vrydag (7 November), Saterdag (8 November) en Sondag­oggend (9 November) opsysit vir die aanbiedings in die Jans Rautenbach Schouwburg in De Beerstraat.

Meer inligting oor kaartjies, ’n spesiale boekwinkel vir die duur van die fees, ’n stewige boekesak asook die volledige feesprogram volg.

• Besoek Prince Albert Leesfees op Facebook.

Deur Liesel le Roux

VOORUITSIGTE vir die komende toerismeseisoen in die Groter Oudtshoorn lyk goed met heelwat verblyfbesettings in verblyfplekke, het Niel Els (voorsitter van die Groter Oudtshoorn Toerisme-bestuurskomitee) by die Algemene Jaarvergadering van die liggaam verlede Dinsdag (30 September) gesê.

’n Nuwe bestuurskomitee vir toerisme is by die vergadering verkies, met Els wat weer deur komiteelede tot voorsitter verkies is.

Volgens Els is een van die uitdagings van Groter  Toerisme om besoekers te oortuig om twee aande hier te bly en om daarom kreatief rondom bemarking te dink.

Els het aangedui dat Groter Oudtshoorn Toerisme sy deure sal oophou solank die munisipaliteit hul bydraes betaal.

Els en Joan Shaw, wat as uitvoerende hoof van Oudtshoorn Toerisme bedank het en aangestel is as bemarkingsbestuurder op George, het albei by die vergadering gesê dat hulle heelwat tyd spandeer het om te besin oor die toekoms van die toerismekantoor en hoe dit verder bestuur sal word.

“Ons sal van nuuts af moet dink hoe ons die hele organisasie met beperkte fondse moet bedryf,” het Els gesê en aangedui dat die nuwe komitee dié aangeleentheid binne die volgende maand moet deurtrap. “Ons sal slim moet werk en vennootskappe moet aangaan,” het hy bygevoeg .

Rika Venter van Oudtshoorn en Brad de Waal hard aan die werk aan ’n nuwe boek oor die grondleggers van die Suid-Afrikaanse kuns wat deur Venter saamgestel word. De Waal, ’n familielid van Venter, is betrokke by die bladuitleg en grafiese ontwerp van die boek.

Deur Liesel le Roux

’N BESONDERSE boek oor Suid-Afrikaanse kuns word tans met groot liefde en deernis op Oudtshoorn aanmekaargesit.

Die skrywer van die boek is die bekende kunskenner en oud-sakevrou Rika Venter (79), wat sedert 2012 op Oudtshoorn woon.

Venter was die stigter van die SA Raad vir Sakevroue 26 jaar gelede en die eerste vrou wat in die hoofbestuur en dagbestuur van die AHI gedien het.

Sy en haar eggenoot, Thinus, was jare lank die eienaars van die Artistico Kunsgalery op George.

“Hierdie boek is die kulminasie van 40 jaar se werk,” sê Venter.

Volgens haar het sy deurentyd oor die afgelope 40 jaar  inligting versamel – soos ’n groot klomp baie dik leêrs met knipsels, ou foto’s en ander inligting wys.

Sy het ook intieme kontak met baie groot Suid-Afrikaanse kunstenaars deur die jare gehad wat haar galery en ook haar huis besoek het.

Die boek, Grondleggers van Suid-Afrikaanse kuns, sal handel oor verskeie van die kunstenaars wat as die grondleggers van die Suid-Afrikaanse kuns bekend staan, soos WH Coetzer en Pierneef, asook onder meer oor kunstegnieke en hoe dit ontwikkel het.

“Ek glo dit gaan ’n inligtingsbron word. Daar is nie tans iets soortgelyks nie,” sê Venter.

Venter vier in Januarie 2015 haar 80ste verjaarsdag en sê sy sal bly wees as sy die boek dan kan bekend stel.

Die De Jager Sportstadion Saterdag-oggend – leë drankbottels en vullishouers. Foto’s: Verskaf

’N SPORTDAG verlede Vrydag vir amptenare in diens van die staat het die wenkbroue laat lig nadat deelnemers die De Jager Sportstadion op Oudtshoorn besaai met leë drankbottels en koshouers agtergelaat het.

Vullishouers wat deur die Departement van Kultuursake en Sport by die stadion geplaas is sodat deelnemers hul vullis daarin kon plaas en dit herwin kon word, is in ’n groot mate geïgnoreer.

Meestersatlete van Mosselbaai en Knysna wat Saterdag op die tartanbaan van dié stadion kom oefen het, kon volgens ’n plaaslike atleet nie glo wat hulle sien nie – pawiljoene besaai met leë drankbottels, leë koshouers, papiere en selfs hoenderbeentjies wat rondgelê het.

“Ons locals het ons doodgeskaam,” sê die atleet wat gevra het om anoniem te bly.

Volgens Annerie Pruis-Le Roux, waarnemende hoof van kommunikasie by die Wes-Kaapse Departement van Kultuursake en Sport, het sowat 5 000 mense aan die Better Together Games op Oudtshoorn deelgeneem.

Dit is ’n Wes-Kaapse regeringsinisiatief wat amptenare in diens van die staat die geleentheid bied om saam aan sportaktiwiteite deel te neem.

Vier vrywillige sekuriteitsbeamptes was op diens en het nou met die plaaslike munisipaliteit en SAPD saamgewerk.

Pruis-Le Roux sê deelnemers is voor die spele ingelig dat dit ’n alkoholvrye sportgeleentheid was.

“Die Departement van Kultuursake en Sport ondersteun nie die gebruik van alkohol op sulke dae nie.”

Volgens haar sal die departement die aangeleentheid ondersoek sodat verdere soortgelyke voorvalle voorkom kan word.

Sy het ook aangedui dat die saak met die Oudtshoorn Munisipaliteit bespreek is en die stadion Maandag skoongemaak is.

Ironies genoeg is die spele juis veronderstel om ’n “verantwoordelike leefstyl” te bevorder.

“Die Departement van Kultuursake en Sport is verantwoordelik vir die logistiek van die spele en werk saam met plaaslike munisipaliteite en ander diensverskaffers. Ons hoofdoelwit hiermee is om ’n verantwoordelike leefstyl by werknemers aan te moedig, interaksie tussen werknemers te verbeter en ’n gesonde spangees te bevorder. Omdat die spele so gewild is, neem werknemers van plaaslike en nasionale regeringsdepartemente ook deesdae daaraan deel,” aldus Prius-Le Roux.

Stefan Bloem (24)

Deur Liesel le Roux

’N OUD-LEERDER van die Hoërskool Oudts­hoorn, Stefan Bloem (24), is verlede Donderdag­aand (2 Oktober) noodlottig beseer in ’n botsing tussen twee vragmotors op die N2 voor Witelsbos in Stormsrivier.

Volgens ao Gerda Swart, polisiewoordvoerder van die streek, het die botsing omstreeks 23:50 plaasgevind. Bloem, wat as swaarvoertuigbestuurder gewerk het, was met ’n MAN-vragmotor vanaf Kaapstad na Port Elizabeth op pad en die ander vragmotor, ’n koerier-voertuig, van Port Elizabeth na George toe die botsing plaasgevind het. Die 38-jarige bestuurder van die koeriervoertuig is slegs lig beseer.

Swart sê die pad was na die ongeluk tot omstreeks 08:30 Vrydagoggend gesluit.

Bloem se kollegas by Tandem Cranes and Edlynway Transport and Cranes in Kaapstad groet hom vandeesweek in ’n baie mooi huldeblyk in die koerant op bladsy 2.

Sy roudiens vind Saterdag om 11:00 in die NG Moederkerk op Oudtshoorn plaas.

Hy word oorleef deur sy ma, Nossie, en ’n suster en swaer, Annalize en Jason Porril.

Deur Schalk le Roux

DIE publiek van Oudtshoorn en die Suid-Kaap gaan vanjaar baie meer geleenthede as voorheen hê om in die opwinding van die Bridge Cape Pioneer Trek, ’n internasionaal erkende multiskof-bergfietsren, te deel. Die fietsren begin die naweek met fietsryers van 15 lande wat deelneem!

By Sondag se proloog by Buffelsdrift sal van die wêreld se voorste bergfietsryers in aksie wees. Die proloog begin en eindig naby Buffelsdrift se hoofkwartier met verskeie uitkykpunte langs die roete.

Die eerste skof van die fietsren begin Maandag in die middel van Oudtshoorn in Baron van Reedestraat voor die Queen’s Hotel en CP Nel Museum. Dit is die eerste keer dat dié fietsren in die dorp begin.

Henco Rademeyer van Dryland Event Management, wat die Cape Pioneer Trek organiseer en aanbied, nooi toeskouers na Maandagoggend  se wegspring om 07:30.  Paul Walstar, die kommentator, sal toeskouers op hoogte hou van wat aangaan.

Die grootste verandering aan die wedren is egter volgende Saterdag wanneer die fietsren op dieselfde plek in Baron van Reede gaan eindig en inwoners sal kan deel in die opwinding by die eindpunt! Met die gedeelte van Baron van Reedestraat tussen St John- en Vredestraat wat van 05:00 tot 18:00 gesluit sal wees, gaan die omgewing in ’n feestelike terrein omskep word. ’n Groot Bedoeïen-tent gaan op die grasperk langs die CP Nel Museum op die hoek van Baron van Reedestraat en Voortrekkerweg opgeslaan word waar deelnemers na voltooiing van die uitmergende wedren kan ontspan.

Verversings vir die publiek sal te koop aangebied word.

Met al die restaurante aan weerskante van die betrokke gedeelte van Baron van Reedestraat sal toeskouers ook van daar af die aktiwiteite by die eindstreep kan dophou.

Paul Walster sal weer daar wees en oor ’n sterk luidsprekerstelsel toeskouers op hoogte hou van hoe die laaste skof verloop en interessante inligting oor die fietsryers te vertel hê.

• Oudtshoorniete kan trots daarop wees om ’n internasionale multiskofbergfietsren van die gehalte van die Cape Pioneer Trek uit eie geledere aan te bied. Dryland Event Management, met Rademeyer, Carel Herholdt en Bernard le Roux aan die roer van sake, bied die wedren aan. Hulle het oor die afgelope jare tientalle Oudtshoorniete tydens die ren betrek en ’n goed geoliede span opgebou.

Dryland se benadering is ook om baie in plaaslike gemeenskappe en veral skole terug te ploeg.

Heelwat Oudtshoorniete neem aan die fietsren deel. Meer daaroor volgende week.

Jongilizwe Tyatya, taksekretaris van die ANC se Patrick Madikane-tak in Bongolethu Maandag aan die woord voor die Oudtshoorn Munisipaliteit, tydens ’n optog van ANC-ondersteuners na die munisipaliteit. Tyatya het ’n memorandum met eise aan die onderburgemeester, Vlancio Donson, en die speaker, John Stoffels, oorhandig in die afwesigheid van burgemeester Gordon April wat nie daar was om die meorandum te ontvang nie. In die memorandum word April en die raad sewe dae gegee om op die eise daarin vervat te reageer

Deur Liesel le Roux

’N MEMORANDUM wat eis dat die burgemeester van die Groter Oudtshoorn, Gordon April, en die raad binne sewe dae  reageer op die eise daarin vervat, is Maandag tydens ’n optog van sowat 300 ANC-ondersteuners aan die onder-burgemeester, Vlancio Donson, en die speaker, John Stoffels, oorhandig.

April was nie die oggend op die trappe voor die munisipaliteit om die memorandum te ontvang nie.

Die memorandum eis ’n einde aan korrupsie en wanadministrasie, nepotisme en die spandering van munisipale geld op regskoste. Dit eis verbeterde dienslewering en vra ook dat die waarnemende munisipale bestuurder, Ronnie Lottering, onmiddellik uit sy pos verwyder moet word. Dit eis voorts dat April die president versoek om die  Spesiale Ondersoek-eenheid (SOE) opdrag te gee om korrupsie by die munisipaliteit te ondersoek

Die optog wat georganiseer is deur die Patrick Madikane-tak van die ANC in Bongolethu, was ’n aanduiding dat baie ANC-ondersteuners nie tevrede is met die situasie by die munisipaliteit nie.

“Daar moet daarop ag geslaan word dat hierdie eise nie onderhewig is aan onderhandeling nie, maar onmiddellik aan voldoen moet word. Ons sal nie rus totdat aan hierdie eise voldoen word nie. As dit nodig is, sal ons terugkom en die munisipaliteit beset en die dorp onregeerbaar maak,” lui die memorandum ten slotte.

Die optoggangers is net soos tydens die onlangse optog van DA-ondersteuners en inwonersorganisasies met min respek by die munisipale gebou ontvang.

Daar was weliswaar ’n banier bokant die voordeur wat optoggangers genooi het tot gesprek, maar die vier groot luidsprekers was weer daar om die optoggangers met harde musiek en ’n man wat hard in Engels begin praat het, te probeer onderbreek.

Daar was darem nie weer die arendsoog van videokameras om te probeer vasstel watter inwoners aan die optog deelgeneem het nie.

Volgens die ANC-memorandum het die optog gespruit uit ’n gesamentlike kommer oor hoe die munisipaliteit in die afgrond bestuur en tot bankrotskap geplunder word deur sekere elemente in die “ongelukkige koalisie­regering”.

Die memorandum verwys voorts daarna dat “regering in die munisipaliteit in duie gestort het”  asook na ’n “gebrek aan leierskap op raadsvlak”, wat tot gevolg het dat die amptenary ’n al groter rol speel en Lottering prosesse “uitbuit en manipuleer”.

Reaksie van die munisipaliteit op die optog het ironies genoeg juis van Lottering gekom. Hy het gesê dat die munisipaliteit aandag sal skenk aan die memorandum. “Die Oudtshoorn Munisipaliteit lewer oor die algemeen ’n goeie diens aan inwoners. Ons kyk ook goed na die armer gemeenskappe en is besig om hulpbehoewende huishoudings te registreer vir afslag op onder meer water en elektrisiteit.” Volledige memorandum is hier leesbaar.