Deur Liesel le Roux
Dit is belangrik én noodsaaklik dat inwoners hul op hoogte bring van die watersituasie op Oudtshoorn en waarom die water troebel is. Iemand wat ingelig is, weet ook hoe om op iets te reageer en proaktief op te tree.
Niks nuut nie
Dit is nie die eerste keer dat die dorp se drinkwater bruin of troebel is nie. Omdat Oudtshoorn nie ’n watersuiweringsaanleg het nie, word die dorp se water al jare lank bruin as harde reën in die Raubenheimerdam se opvangsgebied val. Die Hoorn berig al die jare nog daaroor. Ná die massiewe veldbrand van Desember 2016 is die uitwerking van reën daar net veel erger. Oudtshoorn het met dieselfde probleem geworstel ná stortreën met die KKNK verlede jaar.
Nie ’n kitsoplossing
Daar is geen towerstaf waarmee troebel water ná stortreën by die Raubenheimerdam weggewens kan word nie. Sodra plantegroei om die dam herstel, sal minder modder en organiese stowwe in die dam beland. Die langtermynoplossing is egter na ons mening ’n watersuiweringsaanleg.
Dit is egter nie ’n kitsplan nie, sal miljoene rande kos en waarskynlik oor jare ingefaseer moet word. Intussen is die enigste brug oor dié troebel water maar om dit te kook…
Twee redes vir waterprobleme
Dit is ook belangrik dat inwoners moet verstaan daar was vandees-maand twee verskillende waterpro-bleme op die dorp. Baie inwoners besef dit blykbaar nie en verwar die twee probleme. Troebelheid vandeesweek is die gevolg van harde reën op 14 Febraurie. Voor dit egter het watertoetse getoon dat daar Ecoli in een van die reservoirs kon gewees het – ’n vrees wat gelukkig ongegrond was.
The post Al brug oor dié troebel water appeared first on DieHoorn.